طفل الشارع
بقلم محمد عبد الحميد السيد
،،،،عاميه،،،،
صحيت من نومي لاقيت
نفسي في الشارع
أدور على بيتي أو أهلي
غير كده أنا مش طامع
أصرخ من جوايا ليه زمانى
قاسي ولا حد بيا سامع
خلاص الرصيف بقى سكني
ولبيتي أنا مش راجع
خلاص السماء هي سقفي
وبرد الشتاء يا ناس ساقع
مافيش مكان يأويني أنا
خلاص بقيت ضايع
قطعتوني بنظراتكم وأصرخ
يا ناس أنا مش صايع
أنا اللي صحيت لاقيت
نفسي في الشارع
الدنيا قاسيه علي خلاص
حلمي بقي ضايع
لوحدي ليلي طويل ونهاري
بعيد ومش طالع
أنا اللي كنت بحلم يوم
لبلدي أكون نافع
أنا صحيت في يوم لاقيت نفسي
بنام في الشارع
الكل قافل بابه عليه وأنا
عايش وحيد وضايع
الكل عايش في نور وأنا
نوري عالطول قاطع
أنا انسان زيكم ومش ذنبي
اني اترميت في الشارع
أنا غلطه أب وضعف أم
وشيطانهم أعماهم وكان بارع
أنا ظروفي حكمت علي
القي نفسي في الشارع
مافيش حد عمل حاجه تخلي
أملي في الحياة يكون راجع
أنا صحيت لاقيت
نفسي في الشارع
بقلمي محمد عبدالحميد السيد
جمهورية مصر العربية