عاميه
اشمعنا أنا
بقلمي محمد عبد الحميد السيد
اشمعنا أنا يا دنيا جايه ليه ديما عليا ؟؟
اشمعنا أنا بتفرحي بدموع عنيا ؟؟
من يوم ميلادي مشبعاني قهر وهم وأسيه
ما ترحميني كفايه كده يا مفتريه
حطاني في دماغك كرهاني ليه وعنديه ؟
هو انتي مش بتشبعي ارحميني من الأذيه ؟
طب يلا ناخد راحة من العذاب ولو شويه
بطلي يا دنيا فيا حرق دم ومرازيه
كل يوم أصحى القي منك أخبار سلبيه
بجد دنيا صعبه ومش عاديه
ليه بس ديما عالغلابه قادرة ومستقويه ؟
وسايبه ناس تانيه عايشه فيكي شوكتهم قويه
دا احنا غلابه والهدوم ياما مداريه
اشمعنا أنا يا دنيا جايه ليه كده عليا ؟
كل المرار شربت منك ما بترحميش
عمال أقول بكره تبطلي ما بتبطليش
بجد تعبت من الهموم وعايز أعيش
ما تفكك مني كفايه حسي ما بتحسيش
ليه معانده فيا خليتيني كاره أعيش
عاملالي فيها بريئة ما تكدبيش
شغاله فيا كل يوم ضرب وتطليش
كفايه يا دنيا ظلم ما تفتريش
بطلي عمايلك معايا بطلي ما بتزهقيش؟؟
رفعتي ناس لفوق لولا الفلوس متساويش
ارحميني حرام كفايه عايز أعيش
حطاني في دماغك زياده عن اللزوم
دنا بسببك كرهت حتى الهدوم
شبعت منك قهر شبعت من كتر الهموم
احترت أشكي حالي لمين وعلى مين هالوم
ما ترحميني مزودها معايا عن اللزوم
مغرقاني في بحر همك ومش عارف أعوم
ارحميني يا دنيا اشمعنا أنا الوحيد أعيش مظلوم
اشمعنا أنا.... واشمعنا أنا....
بقلمي محمد عبد الحميد السيد
جمهورية مصر العربية