عاميه
كفايه يا دنيا تلطيش
بقلم محمد عبدالحميد السيد
ليه يا دنيا نازله فينا ضرب وتلطيش
من زمان أوي ع حالك ثابته معانا ما بتتغيريش
عماله ترفعي ناس لفوق السحاب كانت متساوييش
وبقول بكره تتعدلي معانا وبكره دا ما بيجيش
احنا كلنا ولادك وبين ولادك يا حلوة ما تفرقيش
بنادي عليكي مطنشاني والا انتي ما بتسمعيش
بصي علينا بصه والا اتعميتي وما بتشوفيش
حني علينا شويه أو حتى ادينا شوية بقشيش
بنطلب منك العدالة والرحمة والا انت ما بترحميش
الطيب مالوش مكان فيكي ومش عارف خلاص يعيش
من يومنا واحنا بنعاني فقر وبطالة ومرض وحاجة صعبة ما ترضيش
تعبنا وجيبنا أخرنا وانتي مطنشة وبينا ما بتحسيش
نتعب ونمرض وندور على علاج ما نلاقيش
حتى الدوا فيكي لناس وناس تانية تموت وما تلاقيش
حاجات كتيرة أوي فيكي لو قلناها الوقت يخلص ما يكفيش
نازلة فينا ضرب في المليان عالطول من غير تهويش
عمايلك فينا كتيرة أوي وما بتنتهيش
رسالتي ليكي كتبتها من وجعي من أفعالك
كفاياكي فينا ضرب وتلطيش
دعيت عليكي ألف دعوة تعبت وعايز أعيش
تعبت من التطليش
بقلمي محمد عبدالحميد السيد
جمهورية مصر العربية